Te Kete Ipurangi Navigation:

Te Kete Ipurangi
Communities
Schools

Te Kete Ipurangi user options:


You are here:

Ngā huarahi ako

''

Mā tāu kori, mā tāku kori, E puta ai te koa, e piki ai te wairua, E rere ai te hinengaro, e tūhono ai ki te ao.

''

Kia mau ki ēnei āhuatanga hei painga mō te tamaiti i a ia e tūhura ana, e mahi ana, e rapu mōhio ana, ā, e whakaatu ana i tāna ohaoha ki tētahi kaupapa.

Tā te pouako

He kai kōkiri, kia kaha hoki ia ki te tauira, ki te tautoko, ki te ārahi i ngā āhuatanga katoa o Te Ao Kori. Kia kaha hoki te kura ki te whakarite i te hunga e tika ana hei tautoko i te pouako. Kei a ia te mahi nui.

Te taiao ako

Mehemea e kite ana ngā ākonga i ētahi tauira mai i Te Ao Kori i roto i ō rātau akomanga tērā anō te whakaaro ka hua ake, kei te ora te ao kori i roto i a au, i roto i taku akomanga waihoki kei te ora i waho o te akomanga.

Kia kore ai e wehewehetia te ao kori, whakaritea ngā taputapu hei whakamahi ia rā, ia rā. Ko te poi, te rākau, te taura, ngā tuaina, otirā ko ngā mea e tika ana. He oro hoki ētahi tino rauemi kia pai ai te kori noa a te ākonga.

Tā te kura

He whakauru, he tautoko, he whakanui kia kitea ai te hononga pai ki te kāinga, ki te hāpori, ki te kura, ki te akomanga, ki tētahi tauwhāinga whakatūria tētahi wā kia whakaatu ngā ākonga i a rātau mahi.

Kaua hoki e katia atu te kori mai iwi kē, tērā ko te hura a te Rarotonga, ko te koiri a te Hapanihi. He koiri katoa ēnei mai i te ao kori o tēnā iwi, o tēnā iwi.

Te hononga ki ngā whānau whānui

Ehara tēnei mahi mā te kura anake. Me mahitahi te kura me te kāinga, me te hapori.

Karangahia ngā mātua, ngā kuia me ngā koroua kia hui ki te kura kia pai ai te whakamahere i ētahi koiri mō te tau. Koinei te wā hei whakakotahi i te kura me te kāinga ko te matapaki i ngā mahi o te ao kori hei titiro, hei mahi, hei whakaputa.

Ko te ao kori hei haumaru, hei whakapiki, hei whakapakari i te ākonga me tōna whānau.

Te taiao kāinga, te taiao hāpori

Ahakoa ko wai te tangata, ahakoa nō hea ia, ka taea e ia te kori, te mātakitaki, te whakapakari.

Kei ngā kāinga, kei te hāpori hoki ētahi tino huarahi whakapakari i ngā pūkenga, i ngā mōhiohio, i ngā ohaoha ki tētahi mahi. Kāti ko te ao kori te tino ao e whakamahia ana e ngā whānau, e te hāpori i tua atu i te kura.

Koinei te ao e taunga ana rātau arā, ko te tākaro, whakataetae, mahi kapa haka, hākinakina ā-papa, hākinakina ā-wai, hākinakina takitahi. Koia nei te tino hua o te ao kori, e kori tonu nei, e kori tonu nei.


Footer: